Sən məni unuda bilməyəcəksən

Gəzib dolanarsan taleyi küskün,

Sən məni unuda bilməyəcəksən

Etriraf edərsən özündə bir gün

Sən məni unuda bilməyəcəksən

Bir həsrət izi var qaşda qabaqda

Çin olmaz arzunam səndən uzaqda

Gülüm yaşasan da kefdə damaqda

Sən məni unuda bilməyəcəksən

Qədirsiz vüsalı tez buraxmışam

İndi hicranıma döz, buraxmışam

Sənin varlığında iz buraxmışam

Sən məni unuda bilməyəcəksən

Min sual doğurar hər künc, hər bucaq

Xatirəm köksündə qalanmış ocaq

Özünü unuda bilərsən –ancaq

Sən məni unuda bilməyəcəksən

Bitər dodağında bir eşqin ahı

Gah göyə yüksələr, səngiyər gahı

Görsən də Sabirdə bütün günahı

Sən məni unuda bilməyəcəksən