Burda bir şəhid yatır

 

                            Səs salma əsən külək,

                            Burda bir şəhid yatır.

                            Sinəsi çiçək-çiçək,

                            Burda bir şəhid yatır.

 

                            Yurdunu çoxdu sevən,

                            Onun tək yoxdu sevən.

                             Köynəyi qanlı kəfən,

                             Burda bir şəhid yatır.

 

                            Qəlbində oğul dağı,

                            Anası deyir ağı.

                            Ömrünün qönçə çağı,

                            Burda bir şəhid yatır.

 

                            Ölümü zəfərə səs,

                            Bacarmaz bunu hər kəs.

                            Keçdiyi yol müqəddəs,

                            Burda bir şəhid yatır.

 

                            Zirvədə görməz heç çən,

                            Ürəyə-qəlbə köçən.

                            Baş əysin ötüb keçən,

                            Burda bir şəhid yatır.